ભારતીય ક્રિકેટ ટીમે ઇંગ્લેન્ડ સામેની વર્તમાન ટેસ્ટ શ્રેણી એક મેચ બાકી રહેતા જીતી લીધી છે. ભારતની આ સફળતામાં સૌથી મોટી ભૂમિકા યશસ્વી જયસ્વાલે ભજવી છે.
આ સમયગાળા દરમિયાન યશસ્વી જયસ્વાલે વિરાટ કોહલીથી લઈને સુનીલ ગાવસ્કર સુધીના ઘણા રેકોર્ડ તોડ્યા છે. તેણે 2 બેવડી સદી પણ ફટકારી હતી. હવે યશસ્વી જયસ્વાલ 29 રન બનાવીને એક નવો સીમાચિહ્ન હાંસલ કરશે.
જો યશસ્વી જયસ્વાલ ઈંગ્લેન્ડ સામેની છેલ્લી ટેસ્ટમાં વધુ 29 રન બનાવશે તો તે ટેસ્ટ ક્રિકેટમાં તેના 1000 રન પૂરા કરશે. આ ઉપરાંત, તે વર્તમાન ICC ટેસ્ટ ચેમ્પિયનશિપ 2023-2025 ચક્રમાં 1000 રન બનાવનાર પ્રથમ ખેલાડી પણ બની જશે. જયસ્વાલે અત્યાર સુધી 8 મેચમાં 971 રન બનાવ્યા છે. ઈંગ્લેન્ડ સામેની વર્તમાન શ્રેણીમાં તેણે 655 રન બનાવ્યા છે. ઓસ્ટ્રેલિયાના ઉસ્માન ખ્વાજા પણ યશસ્વીની આસપાસ છે. ખ્વાજાએ અત્યાર સુધી 11 ટેસ્ટમાં 916 રન બનાવ્યા છે. 1000 રન બનાવવા માટે તેને 84 રનની જરૂર પડશે.
ભારત માટે, માત્ર બે ખેલાડીઓ ટેસ્ટ ચેમ્પિયનશિપ ચક્રમાં 1000 રન બનાવવામાં સફળ થયા છે. અજિંક્ય રહાણેએ 2019-2021માં 18 ટેસ્ટ રમીને કુલ 1159 રન બનાવ્યા હતા. આ સાથે જ રોહિત શર્માએ પણ આ વર્ષે 12 મેચમાં 1094 રન બનાવ્યા છે. જો યશસ્વી જયસ્વાલ તેની 9મી મેચમાં 1000 રન પૂરા કરે છે, તો તે ટેસ્ટ ચેમ્પિયનશિપ ચક્રમાં સૌથી ઝડપી 1000 રન બનાવનાર ખેલાડી બની જશે.
યશસ્વી જયસ્વાલે ભારત અને ઈંગ્લેન્ડ વચ્ચે રમાઈ રહેલી ટેસ્ટ સિરીઝમાં અત્યાર સુધી શાનદાર પ્રદર્શન કર્યું છે. હૈદરાબાદ ટેસ્ટની પ્રથમ ઇનિંગમાં સદી ફટકારવામાં ચૂકી ગયેલા આ યુવા બેટ્સમેને વિશાખાપટ્ટનમમાં પ્રથમ ઇનિંગમાં બેવડી સદી ફટકારી હતી અને ત્યાર બાદ રાજકોટ ટેસ્ટની બીજી ઇનિંગમાં બેવડી સદી ફટકારી હતી. આ રીતે યશસ્વી જયસ્વાલ ઈંગ્લેન્ડ સામે સતત બે ટેસ્ટ મેચમાં બેવડી સદી ફટકારનાર પ્રથમ ભારતીય બન્યો છે.
